بلبل غنى بحقلتنا

بلبُل غَنّى بْحَقلتنا .. رَدَّد نَغماتْ
قال بْجِيرة بَلْدتنا .. العيشِة لَذّاتْ

حلوة تحت الصفصافة .. القعدة بكِّير
والطِيب مْلَوَّن غافي .. بيمُوج كتير
والجدول هاني صافي .. حَولو عْصافير
وعَ هالصفصافة لافي .. أحلى النسماتْ

حلوِة أيَّام الغَلِّة .. وقَطْف الأثْمار
والسمرا تْعَبّي السلِّة .. من دْوالي كتار
ونحنا من حَقلة لْحَقلِة .. بْظِلّ الأشجار
نتنَقَّل متل النحلِة .. فوق الورداتْ

يا بَلْدِتنا أظلالِك .. نَرجِس وورود
ياما من زهور تلالِك .. لَقْوَطْنا وعود
هالقلب اللي بجبالك .. هايِم مَوعود
إلّا بْفَيِّة عِرْزالِك .. ما فيه يباتْ